2 mánuðir

Jæja þá eru allir komnir heim heilir á höldnu. Stórfjölskyldan dreifði sér um löndin og miðin síðastliðnar vikur og er sem betur fer komin heim í einu lagi. Feðginin höfðu það gott og gaman í Þýskalandi í svaka HM stemmningu og 30 stiga hita. Mæðgurnar höfðu það líka mjög gott á Akureyri þar sem var stjanað við þær eins og vanalega. Elvar frændi stóð sig rosa vel og er nú orðinn stúdent frá MA-gott hjá honum. Og svo er minnsta manneskjan auðvitað orðin 2 mánaða. Hún stendur sig alltaf jafn vel elsku hjartað okkar og brosir og burrar til skiptist þegar hún er vakandi. Setti inn nokkrar nýjar myndir í albúmin-það koma fleiri fljótlega.

Sumar (vonandi bráðum amk) kveðjur af Hjarðó!

 

6 vikur

Og tíminn hreinlega flýgur áfram, þó við þurfum að bíða ansi lengi eftir sumrinu. Það hentar okkur mæðgum reyndar ágætlega í augnablikinu þar sem Sigrún Emilía vill gjarnan vaka frameftir til 2 á nóttunni og mamman jafnvel ennþá lengur. Svo er sofið fram á hádegi, við erum sem sagt búnar að snúa sólarhringnum ágætlega við. Vonum bara að magapílurnar eldist af barninu þegar sumarið kemur loksins. Sigrún Emilía heldur áfram að dafna vel, súðavíkurlærin eru mætt á staðinn og kinnarnar fara alveg að ná niður á hné. Hún fór í skoðun á Heilsó í fyrradag, sýndi allar sínar hundakúnstnir og var ægilega góð svo mamman var voða stolt eins og venjulega.

Það er svo nóg að gera hjá fjölskyldunni á næstunni. Sólveig Halla og Eiki fara til Þýskalands í næstu viku og þá erum við Sigrún Emilía að hugsa um að skreppa til Akureyrar í útskrift hjá Elvari. Svo eru ansi margir sem við eigum ennþá eftir að hitta og gaman væri að sjá sem fyrst.

Við sendum öllum þeim rosalega mörgu vinum og ættingjum sem eiga afmæli í júní bestu afmæliskveðjur og hamingjuóskir til Agnesar frænku sem stóð sig svo ótrúlega vel í skólanum

Lísa eða Lotta - hvor er hvað?

Það er alveg ótrúlegt hvað systurnar Sólveig Halla og Sigrún Emilía eru líkar. Eiki hafði orð á því að það sé undarlegt að eignast tvíbura með 4 ára millibili. Ekki er nóg með að þær séu líkar í útliti heldur virðist Sigrún Emilía ætla að hafa mjög líkt skap og systir sín og vera jafn mikill kúrari, nautnaseggur og letiblóð og aðrir í fjölskyldunni... Hún lygnir aftur augunum í heitu vatni alveg eins og pabbi sinn og henni finnst ekkert betra en að liggja í klessu upp við mömmu sína í bólinu. Hún er mjög skapgóð eins og systa, grætur sjaldan og er farin að brosa í hvert skipti sem einhver hefur tíma til að tala við hana. Þeim finnst líka gott að kúra hjá hvor annarri, 4 ára stelpunni okkar tókst að svæfa þá 4 vikna um daginn og sjálfa sig í leiðinni.

Setjum inn nokkrar myndir sem til eru af Sólveigu Höllu þegar hún var ný svo þið getið séð líkindin. Því miður fæddist hún samt áður en stafrænar myndavélar urðu til á hverju heimili svo ekki er hægt að bera þær systur alveg saman á tölvutæku formi.

Minnum svo á athugasemdir og gestabók-viljum endilega sjá hverjir koma í heimsókn.

 

Afmæli

Í dag eiga afmæli Sigrún Emilía Eiríksdóttir og faðir hennar Eiríkur Gunnsteinsson. Sigrún Emilía er eins mánaðar gömul og Eiríkur er 32 ára og sex mánaða. Án þess að á nokkurn sé hallað er þetta hins vegar hiklaust dagurinn hennar. Á þessum mánuði sem liðin er frá því Sigrún Emilía kom til okkar hefur hún dafnað vel, lært að brosa og hefur þyngst um eitt kíló sem er afrek út af fyrir sig. Hins vegar er ekki hægt að fagna þessum tímamótum án þess að minnast á eftirminnilega frammistöðu móður hennar í fjölskylduherbergi 19 í Hreiðinu. Það er ekki annað hægt en að dást að svona hetju.

Þrjár vikur

Nú eru rúmar þrjár vikur síðan Sigrún Emilía kom í heiminn og lífið er farið að ganga sinn vanagang á Hjarðarhaganum. Eiki er farinn að vinna aftur, Sólveig Halla hoppar og skoppar á leikskólanum og Silla og Sigrún Emilía sofa fram að hádegi - mjög notalegt... Sigrún Emilía heldur áfram að stækka, er orðin 5200 gr. og farin að líta í kringum sig, æfa sig að halda höfði og brosa pínulítið, mömmu og pabba til mikillar gleði. Það sorglegasta sem hún hefur lent í á sinni stuttu ævi er að rífa svo fast í hárið á sér að hún fór að háorga og þurfti aðstoð við að losa takið.

Annars gengur mjög vel með þær systur, Sólveig Halla er mjög montin af systur sinni og vill helst halda á henni og knúsa öllum stundum. Stundum svitna foreldrarnir þegar hún byrjar að reyna að hreyfa þá stuttu þannig að lítið og laustengt höfuðið sveiflast fram og tilbaka. En hún á ekkert annað en hrós skilið fyrir hvað hún hefur tekið litlu systur sinni vel.

Sigrún Emilía Eiríksdóttir

Litla manneskjan vex og dafnar ótrúlega vel og hefur fengið nafnið Sigrún Emilía. Hún er oft kölluð Mía en Jökull frændi heyrði að það væri nafnið hennar þegar hann kyssti bumbuna einu sinni. Sigrún Emilía fór í 5 daga skoðun í morgun og var útskrifuð með 10 í einkunn. Hún er búin að ná fæðingarþyngd sinni og rúmlega það svo ljóst er að rjóminn er farinn að fljóta. Sólveig Halla er rosalega góð stóra systir, vill alltaf vera að halda á systur sinni og strjúka henni og klappa. Henni finnst reyndar ekkert gaman þegar hún orgar og vill helst loka á þetta "vonda væl." En eins og sjá má á myndunum er hún ægilega umhyggjusöm og góð.

Takk fyrir allar kveðjurnar - hlökkum til að hitta ykkur flest sem fyrst!

Silla, Eiki, Sólveig Halla og Sigrún Emilía

Nýja litla

er loksins komin, foreldrum sínum og stóru systur til mikillar gleði. Hún fæddist laugardaginn 22. apríl 2006 kl.13:10 og gekk fæðingin vel, mamman stóð sig eins og hetja (þó hún segi sjálf frá...)  og pabbinn ekki síður. Nýja var 18 merkur og 55 cm og mjög lík Sólveigu Höllu systur sinni. Erum búin að setja inn myndir í albúmið Nýja.

Bestu kveðjur af Hjarðarhaganum!

Silla, Eiki, Sólveig Halla og litla manneskjan.

Getur einhver sagt mér

hvernig ég get komið í veg fyrir að nýjasta bloggið okkar birtist á forsíðu mbl bloggsins? Vil hafa bloggið fyrir vini og vandamenn og það fer svooo í taugarnar á mér að það skuli birtast þarna á forsíðunni undir nýjustu færslur, sérstaklega þegar ég er búin að merkja í stillingum að ég vilji ekki að bloggið sjáist í listum....

Hjálp - anyone?

Enn bólar ekkert...

á Míu litlu eins og Jökull krúttfrændi kallar bumbuna. En nú er fermingarveislan hans Ingólfs afstaðin, Kristín komin til landsins, fataskáparnir tilbúnir í svefnherberginu og prjónateppið á leiðinni í þvottavélina... svo það er ekki eftir neinu að bíða... en ætli við bíðum samt ekki aðeins lengur...

Dagurinn

Jæja þá er dagurinn kominn, skv. meðaltalinu á barnið okkar að vera tilbúið í dag, 11.apríl. Það er aftur á móti ekki alveg sammála og ætlar að hafa það notalegt á Hótel mömmu svoítið lengur, svona eins og börnin í fjölskyldunni vilja helst hafa það. Meðgangan er sem sagt komin á það stig að mamman má ekki fara út fyrir húsins dyr án þess að spurt sé um hana út um allan bæ. Undarlegt hvað maður getur verið æstur í að vita allt um gang mál hjá öðrum ófrískum konum en sýnir því svo lítinn skilning þegar maður er spurður sjálfur.... er eitthvað að gerast? Lofa að við látum vita um leið og eitthvað gerist. Set inn myndir af Sólveigu Höllu á fæðingardeildinni til að stytta biðina....